အဖွင့်စာမျက်နှာ
ငယ်ငယ်ကတည်းက ပါလာတဲ့ပိုးက စာရေးဖို့ပါ။ စာရေးတယ်ဆိုတဲ့နေရာမှာ စကားပြေ ကဗျာ ဆိုပြီး ရှိတဲ့ထဲက ကိုယ့်ကိုယ်ကိုယ် ကဗျာကိုရေးတတ်တယ်လို့ကိုမထင်ဘူး။ ကဗျာဆိုတာ သိပ်ကိုလေးနက်ပြီး လှပတဲ့အရာတခုမို့ ကိုယ်နဲ့တန်တယ်လို့လည်းမထင်ဘူး။ အရမ်းကို မြင့်မြတ်တဲ့ တစုံတရာလို့ ယူဆတဲ့အတွက် စကားပြေလိုင်းကိုပဲ ကိုယ့်ဖာသာရွေးချယ်လိုက်ပါတယ်။ စကားကိုအကုန်ပြောတာမဟုတ်ပါဘူး။ ကဗျာလေးတွေကိုချစ်ပါတယ် ရေးဖွဲ့နိုင်တဲ့သူတွေကိုလည်း အလွန်လေးစားပါတယ်။ ငယ်ငယ်ကတော့ ဒီလောက်မစဉ်းစားဘဲ ကဗျာလေးတွေရေး တယောက်ထဲဖတ်ဖို့ သိမ်းထားခဲ့ဖူးပါတယ်။ ကြီးလာတော့မှ ကဗျာဆိုတာ ကိုယ်နဲ့ အရမ်းအလှမ်းဝေးပါလားလို့ ထင်ခဲ့တာပါ။ (အသက်ကြီးလာပတာနဲ့အမျှ ရိုးသားမှုတွေ လျော့လျော့လာပြီး ကိုယ့်ကိုယ်ကိုယ် ယုံကြည်မှုနည်းလာတာလည်းပါတာပေါ့လေ)
ဒါနဲ့ပဲဝတ္ထုတိုလေးတွေရေးပြီး မဂ္ဂဇင်းတွေကို ပို့ခဲ့တယ်။ ကိုယ်စံပြုတဲ့ အယ်ဒီတာ စားပွဲကို မှတ်ကျောက်တခုလိုသဘောထားပြီး ဝတ္ထုတိုလေးတပုဒ်ပါခွင့်ရဖို့အရေး သုံးလေးလ၊ တခါတလေ လပေါင်းများစွာ ရင်တခုန်ခုန်နဲ့စောင့်ပြီး ပုံနှိပ်စာလုံးလေးတွေအဖြစ် ကိုယ့်ဝတ္ထုတိုလေးတွေ အက်ဆေးလေးတွေ ကိုမြင်ခွင့်ရလိုက်တဲ့ အချိန်ကလေးကတော့ ဘာနဲ့မှနှိုင်းဆလို့မရလောက်အောင် တန်ဖိုးရှိလှပါတယ်။
ပါဖူးတဲ့ဝတ္ထုတိုလေးတွေကို စာအုပ်ကလေးတအုပ်အဖြစ် လုပ်ချင်ပေမယ့် အကြောင်းကြောင်းကြောင့် လုပ်ခွင့် မကြုံခဲ့ဘူး။ ဘလော့ဆိုတဲ့ ကိုယ်ပိုင်အခွင့်အရေးအပြည့်ရတဲ့ အင်တာနက်စာမျက်နှာလေးတခုမှာ၊ စင်ကလေးတ ခုမှာ ကျမရဲ့ဝတ္ထုတိုလေးတွေ တင်ခွင့်ရတော့မှာဖြစ်တဲ့အတွက် ဝတ္ထုတိုလေးတွေ မဂ္ဂဇင်းစာမျက်နှာမှာ ပါခဲ့တုန်းကလို စိတ်ချမ်းသာ ပျော်ရွှင်ရပါတယ်။ ကိုယ်ပိုင် မဂ္ဂဇင်းကလေးတအုပ်လို ကျမလုပ်ချင်တာ ရေးချင်တာလေးတွေ တင်ခွင့်ရတော့မှာမို့လို့ အူမြူးမိသလို တော်တော့ကို အူကြောင်ကြားနိုင်တဲ့ ကျမကို နည်းပညာပိုင်းနဲ့ပတ်သက်ပြီး စိတ်ရှည်စွာနဲ့ ကူညီပေးတဲ့ တူလေးထူးမြတ်ကို အထူးကျေးဇူးတင်ရပါတယ်။
ဒီစာမျက်နှာပေါ်မှာ ကျမရဲ့ဝတ္ထုတိုဟောင်းလေးတွေ အက်ဆေးဟောင်းလေးတွေနဲ့ နောက်ထပ်ရေးမယ့် ဝတ္ထုတို သစ်တွေ အက်ဆေးလေးတွေ နောက်ပြီး စိတ်ကူးတည့်သလိုဖန်တီးမိမယ့် စာညွန့်လေးတွေပဲတင်ပါမယ်။ ဆောင်းပါးတို့ သတင်းတို့ကို တင်ဖို့တော့ အစီအစဉ်မရှိပါဘူး။ အနုပညာနဲ့ ပတ်သက်သမျှ ကိုယ်တသက်လုံး မက်ခဲ့တဲ့ အိပ်မက်ကလေးတွေကိုပဲ အကောင်အထည်ဖော်မှာ ဖြစ်ပါတယ်။ ။
ွ
Wednesday, April 16, 2008
|
|
This entry was posted on Wednesday, April 16, 2008
You can follow any responses to this entry through
the RSS 2.0 feed.
You can leave a response,
or trackback from your own site.
0 comments:
Post a Comment