စာနယ်ဇင်းသမားဘဝကမောက်ကမ ၃

ကိုယ့်သေတွင်းကိုယ်တူးမိပုံများ ပြောပါတယ်။ တကယ်က ကမောက်ကမ ၂ မှာ စာရေးဆရာမင်းလူ နဲ့ အင်တာဗျူးပြီးတဲ့ထိ ရေးမလို့ပါ။ ဒါပေမယ့် တူးတူးသာရဲ့ထုံးစံအတိုင်း ပျင်းပြီး ငါရပ်လိုက်တော့မှပါလေ လို့တွေးရင်း ရပ်လိုက်မိတယ်။ နောက် တရက်ကျော်ကျမှ ပြန်ရေးမလို့ဟာ။ ကွန်မန့်မှာ ဝိုင်းအော်ထား တာတွေ့တာနဲ့ မနေရဲဘဲ ရေးလိုက်ရပါတော့တယ်။ တချို့က ကျမပညာပြတယ်တဲ့ (အဟင့်) မဟုတ်ရ ပါဘူး၊ ပျင်းရုံလေးပျင်းမိတာပါ။ ကျမကလည်း ကျမပဲလေ။ ရေးရတာထက် ဖတ်ရတာ ပိုကြိုက်တဲ့ သူဆိုတော့ ပုံမှန် တက်ဖတ်နေကျ ဘလော့လေးတွေမှာ အသစ်မတွေ့ရင် သွားသွား အော်မိတာကိုး :) ကိုယ့်အလှည့်ကျ မနွဲ့စတမ်းပေါ့ ....။ ကိုင်း ရွာစားရေ ... မတိမ်းမစောင်းဗိန်းဗောင်းနဲ့ ပို့ ...။

ဆဒ္ဒန်မင်းလူနှင့် သောနုထ္ထိုရ် ကျွန်ုပ်

အင်တာဗျူးဂျာနယ်ရဲ့ အယ်ဒီတာချုပ် ကိုဟန်ထက်မောင်နဲ့ နာယက အဖွဲ့ထဲမှာပါတဲ့ အန်ကယ်ကြီး ဖိုးသောကြာတို့ ကျမကို ဆရာမင်းလူဆီလွှတ်တာ အကြောင်းရှိပါတယ်။ လတ်စသတ်တော့ ကျမက ကျမရဲ့ စီဗီမှာ အဖေနာမည် အရင်းအပြင် ကာတွန်းအနောင်ဆိုပြီး ကွင်းစ ကွင်းပိတ်နဲ့ ထည့်ထားခဲ့ မိတာကိုး။ အဲဒီမှာ မျိုးဗီဇကျွမ်းကျင်သူ အယ်ဒီတာမင်းများက ကျမရဲ့ ဂျန်နရေးရှင်း ရင်းမြစ်ကိုလိုက်ပြီး ဒီကောင်မလေးကတော့ဖြင့် မင်းလူနဲ့ ဆွေမျိုးတော်တယ် .. သူသွားဗျူးရင်ဖြင့် ဟိုကတော့ ဖြေမှာပဲ ဆိုပြီး သူတို့ဘာသာ ကောက်ချက်ဆွဲ ပြီးတော့ ကျမကို လွှတ်ကြတာလေ။

တကယ်က ကျမက ဆရာမင်းလူနဲ့ ဘာမှမဆိုင်ဘူး။ ဆရာမင်းလူရဲ့ အကိုကြီး ဒါရိုက်တာ၊ စာရေးဆရာ မောင်ဝဏ္ဏရဲ့ မိန်းမ ဒေါ်ချိုရီကမှ ကျမအဖေရဲ့ ညီမအငယ်ဆုံး ကျမတို့ရဲ့ အဒေါ် ...။ ဆိုတော့ သွေးဘာမှ မတော်စပ်ဘူး။ ဒါပေမယ့် နည်းနည်းပါးပါး ရင်းနှီးတာလောက်တော့ ရှိတာပေါ့။ သို့သော် .. ဆရာမင်းလူကို ကျမက လေးစားတဲ့၊ ကြောက်တဲ့ အခံကရှိတယ်။

မကြောက်ဘဲနေမလား ဦးဝဏ္ဏရဲ့သမီး ကျမညီမ ဝါနုခေါ် ချန်ဒြာက ကျမကို တခါက တိုးတိုး သတိပေးဖူးတယ်လေ “မတူးသိလား။ သမီးတို့ကလေးတွေက အဖေတို့ညီအစ်ကိုတွေထဲမှာ ဦးဥာဏ်ကို အကြောက်ဆုံးပဲ” တဲ့။ ဆရာမင်းလူရဲ့ နာမည်ရင်းက ဦးဥာဏ်ပေါ် မဟုတ်လား။

သာဓုခြံထဲမှာ ဦးဥာဏ်ဟေ့ဆို ကလေးကစ ခွေးအဆုံး တခြံလုံး ဖိန့်ဖိန့်တုန်ပဲ ဆိုတာ ကျမက အတွင်း သတင်း ရထားပြီးသား။ လူကောင်ကသေးသလောက် အားမနာတမ်း ဘုပြောတတ်တာလည်း ကျမက သိတယ်။ စိတ်ကလည်း ဘာတိုသလဲပဲ။ ဒါပေမယ့် ကျမနဲ့တော့ နည်းနည်းခင်တယ်။ သူ့ဆီ သွားလည် သူ့အစ်ကို... ဦးရူပရဲ့ လက်ဘက်ရည်ဆိုင်မှာ သူတိုက်တဲ့ လက်ဘက်ရည်ကို သောက်ပြီး စကားစမြည် ပြောနေကျ။ ဒါပေမယ့် တခုရှိတာက ကျမနဲ့ ဆရာနဲ့ပြောလိုက်ရင် စာအကြောင်းပေအကြောင်း တခုမှ မပါဘူး။ အများသောအားဖြင့် သီချင်းအကြောင်းတွေ၊ ဂီတအကြောင်းတွေ ပြောဖြစ်တာများတယ်။

ဆရာက လက်ဘက်ရည်ကို ခွက်အကြီးနဲ့သောက်တာ (တိုင်ကီပေါ့)။ ပြီးတော့ ဆေးလိပ်တိုကို သောက်သည်ဖြစ်စေ မသောက်သည်ဖြစ်စေ လက်ကြားမှာညှပ်ပြီး စကားပြောတတ်တယ်။ ကျမက ဦးဝဏ္ဏတို့ ဦးဗလ (သုမောင်) တို့ ထက် သူ့ကိုပိုခင်တယ်။ ဟိုဆရာကြီးတွေက နားက တော်တော် လေးတော့ စကား ပြောရင် အော်ပြောရတာနဲ့ မလွယ်ကျော။ ဦးဝဏ္ဏဆို စကားကို တိုးတိုးလေး ပြောတာ ဆိုတော့ ကျမက နားတဘက်လေးနေတာနဲ့ ဘယ်လိုမှ အဆင်မပြေဘူး (သူများအကြောင်း ပြောရင်း ကိုယ့်အကြောင်း တွေပါ ပေါ်ကုန်ပြီ :P) ဆိုတော့ကာ စကားကို ပြတ်ပြတ်သားသား ရှင်းရှင်း လင်းလင်းနဲ့ ပြောတဲ့ ဆရာဥာဏ်နဲ့ ကျမက လေပေး အတော်ဖြောင့်တယ်ပြောရမယ်။ သို့သော် ကြောက်တာက ကြောက်တာပဲ။

ကြည့်ရတာ ကျမနဲ့ ဆရာဥာဏ် နည်းနည်းရင်းနှီးတာကိုလည်း အယ်ဒီတာမင်းများက သိထားပုံရတယ်။ မေးခွန်းက တခုတည်း မေးရမှာနော်။ ဘာမှမသိ နားမလည်တဲ့ အူကြောင်ကြောင် ကျမက “ဟုတ်ကဲ့” တခွန်းပဲပြောပြီး သင်္ဃန်းကျွန်းက သာဓုခြံကို ချီတက်ခဲ့ပါတော့တယ်။ သွားခါနီးမှာ ကိုဟန်ထက်မောင် က “ညနေ အဲဒီအင်တာဗျူး ယူလာပေးနိုင်ရင် အလုပ်ရပြီနော်” တဲ့။ လုပ်ပုံ ...။

သင်္ဃန်းကျွန်း အသင်းတိုက် မှတ်တိုင်မှာ ဆင်းပြီးတာနဲ့ ကျမ ဆရာဥာဏ့်ဆီ ချက်ချင်း မသွားရဲဘူး။ ဒေါ်ဒေါ်ချို (မောင်ဝဏ္ဏမိန်းမ ဒေါ်ချိုရည်) ဖွင့်ထားတဲ့ ကုန်စုံဆိုင်ထဲကို လှစ်ကနဲဝင်ပြီး ကျမညီမတော် ကို ရှာတယ်။ အခန့် သင့်ပဲ မဝါနု က မျက်မှန်လေး တဝင်းဝင်းနဲ့ ကုန်ပစ္စည်းတွေကြား မြုပ်နေလေရဲ့။

“ချန်ဒြာ ... ညီမလေး ... ဘာလုပ်နေလဲဟင်”
“ဆိုင်ထိုင်ပေးနေရတယ်လေ မတူးရဲ့”
“ဟုတ်လား ... ဟိုဘက်မှာ ဦးဥာဏ်ရှိလား” (စ စုံစမ်းပြီ)
“မပြောတတ်ဘူးလေ ... ရှိမယ်ထင်တယ် သွားကြည့်ပါလား။ ဘာလုပ်မလို့လဲ”
“သူ့ကို အင်တာဗျူးစရာလေး တခုရှိလို့ဟ။ အစ်မနဲ့ လိုက်ခဲ့ပါလား။ အဟဲ” (မျက်နှာချိုကလည်းသွေးရ)
“ဟာ ... အင်တာဗျူး မလို့ ဟုတ်လား” (အထိတ်တလန့်သံနဲ့မေးတာ)
“အင်းလေ”
“မလုပ်ပါနဲ့ မတူးရယ်။ ဦးဥာဏ်အကြောင်းမသိဘူးလား။ အော်ထုတ်မှာနော်။ သူကပြောပြီးသား၊ သူ့ကိုအင်တာ မဗျူးကြနဲ့တဲ့။ သူပြောချင်တာတွေကို သူ့ဖာသာရေးမှာတဲ့” (အဲလိုအားပေးတာပေါ့)
“ဒါပေမယ့် မတူးကတော့ မဗျူးလို့မဖြစ်ဘူးဟ” (ဟန်ကိုယ့်ဖို့ဆိုတဲ့လေသံနဲ့)
“ဒါဆိုရင်တော့ မတူးဘာသာ သွားကြည့်လေ။ ညီမလေးတော့ကြောက်တယ်။ မလိုက်ရဲဘူး”

သွားပြီ ...။ အနားမှာ မုန့်တထုပ်ကိုလာဖြုတ်ရင်း ပြုံးဖြဲဖြဲ လုပ်ပြနေတဲ့ ဥက္ကာ (ဝါနုမောင်အငယ်ဆုံး၊ ဓာတ်ခဲ လုပ်တဲ့ကောင်) ကို ခေါ်သွားဖို့ကလည်း ဘယ်လိုမှ မဖြစ်နိုင်ဘူး။ သူက ကလေးဆိုတော့ ဘာမှ အကူအညီရမှာ မဟုတ်တဲ့ပြင် ပေါက်ကရတွေ ဝင်ပြောမှဖြင့် ... ပြေးပေါက်မှားနေဦးမယ်။

ကဲ လာလေရော့ ကိုယ့်ဘာသာပဲသွားရတော့မှာပေါ့။ ခုပြန်စဉ်းစား ခုကြောက်တုန်းမို့ ဆရာဥာဏ့်ဆီ မရောက်နိုင်ဘဲ ဝေ့လည်ကြောင်ပတ်လုပ်နေမိတာပါ။ သီးခံဖတ်ပါနော်။ ခု ရောက်ပါပြီ။ သူ့အိမ်ပေါ် တက်သွားတာနဲ့ အိမ်ရှေ့မှာ ဘွားကနဲတွေ့လိုက်ရတယ်။ အဲဒီမှာ ကျမလည်း နိဒါန်းတွေ ဘာတွေ ချီမနေတော့ပဲ တရစပ်ကိုယ်ဖြစ်ချင်တာကို ပြောတော့တာပဲ။ (စာနယ်ဇင်း အတတ်ပညာတွေ ရေးရေးနေတဲ့ အသားမည်းမည်း၊ ရုပ်ဆိုးဆိုးပုဂ္ဂိုလ်ကြီးမသိလို့။ သိရင် ကျမကို လေးစားသွားမယ်:P)

“ဟာ ဘယ်က လှည့်လာတာလဲ။ လာ ထိုင်လေ” လို့ ဆရာကပြောလိုက်တာနဲ့ ကျမက “ဟုတ်ကဲ့ ဆရာ သမီးဆရာ့ဆီ သက်သက်လာတာပါ။ ဆရာမှ မကူညီရင် သမီး အလုပ်မရတော့ဘူး။ ကူညီပါဦး”
အဲဂလို တည့်တိုးကိုပြောချလိုက်တာ။ ဆရာလည်း အံ့တွေသြလို့ပေါ့။ “ဗျာ ... ဘယ်လို ... ကျနော် နားလည် အောင် ပြောပါဦှးဗျ” လို့ ပြန်မေးတယ်။

အဲဒီမှာကျမလည်း ဖြစ်ကြောင်းရယ်ကုန်စင်ကို နတ်သံမနှောဘဲ ပြောပြလိုက်တော့တယ်။ ကျမ အင်တာဗျူးဂျာနယ်မှာ အင်တာဗျူးဖြစ်တဲ့အကြောင်း၊ အင်တာဗျူးဂျာနယ်ရဲ့ အယ်ဒီတာ မင်းများက ကျမကို လက်တွေ့အင်တာဗျူးတခု လုပ်ခိုင်းကြောင်း၊ အဲဒါကတော့ ဆရာ မင်းလူကို လေထန်ကုန်း လက်ဖက်ရည်ဆိုင်နာမည်ကိစ္စ မေးခိုင်းကြောင်း၊ အဲဒီအင်တာဗျူးကို ဒီညနေ အပြီးပေးနိုင်ရင် ကျမ အလုပ်ရပြီဖြစ်တဲ့အကြောင်း ... အကြောင်းပေါင်းစုံ ရှင်းပြလိုက်တဲ့ အချိန်မှာ ဆရာက ဝုန်း ကနဲ စားပွဲကို လက်သီးနဲ့ မထုပါဘူး။

ဒါပေမယ့် ဆရာ့မျက်နှာကတော့ အဲဒီလို ဝုန်း ကနဲမြည်အောင် စားပွဲကိုခြေနဲ့ ပိတ်ကန်လိုက်တဲ့ မျက်နှာ ဖြစ်သွားပါတယ်။ ကျမလည်း ဗြုန်းကနဲလန့်ပြီး ထွက်ပြေးဖို့ အပေါက်ဝကို မျက်စေ့က ရှာမိလျက်သား ဖြစ်သွားတယ် (အဲဒီကတည်းက စာနယ်ဇင်းသမားဖြစ်ဖို့ ဇာတာပါလာတာထင်ပါရဲ့။ ခုဆို ပြေးပေါက် အရင်ရှာတတ်တာ ကျင့်သားတောင်ရနေပြီ :p)

“ဒီလူတွေ ... ဒါ သက်သက် လူလည်ကျတာဗျ”
“.......” (ခေါင်းလေးငုံ့ပြီး မျက်နှာသေလေးနဲ့ပေါ့)
“ကျနော်က အင်တာဗျူးတွေ မဖြေဘူးဆိုတာသိလို့ ခုလိုလုပ်တာ”
“ဟုတ် .... ကဲ့ ... ဆရာ” (အတိုးဆုံး အသံ)
“ကျနော်မဖြေဘူးဆိုရင် ဘာဖြစ်မလဲ”
“ဟိုဒင်း ... သမီး အလုပ်မရတော့ဘူးပေါ့ ဆရာ” (အဲဒီမှာ ကျမမျက်နှာက ဆီးစေ့လောက်ပဲရှိမလား မပြောတတ်ဘူး၊ မျက်နှာငယ်တာပြောပါတယ်)

ကျမရဲ့မျက်နှာကပဲ တကယ့်သနားစရာ ဖြစ်နေလို့လား၊ ဒါမှမဟုတ် ငါတော့ဖြင့် ကောင်းမှုကုသိုလ် တခုတော့ လုပ်လိုက်ပါဦးမယ်ဆိုတဲ့ ဆရာ့ရဲ့ နတ်ကောင်းလေးကပဲ နိုင်သွားလို့လားမသိဘူး ....
“အင်းလေ ... ဖြေပေးလိုက်ပ့ါမယ်။ ဒါ ပထမဆုံးနဲ့ နောက်ဆုံးပဲနော်။ လာ လက်ဘက်ရည်ဆိုင်သွား မယ်” ဆိုပြီး ရှေ့က ဘောက်ဆတ်ဘောက်ဆတ် လျှောက်ထွက်သွားလေတော့ ကျမကလည်း နောက်ကနေ (ပျော်သော်လည်း မျက်နှာပိုးလေးသတ်လို့) ခပ်ကုပ်ကုပ် လိုက်သွားရလေသတည်းပေါ့။

ကဲမေးခွန်းစပြီ “ဒီလိုပါဆရာ လေထန်ကုန်းဆိုတဲ့ နာမည်ကို ဆရာပေးတာလို့ ကြားဖူးပါတယ်။ အဲဒါဟုတ်ပါသလား” ... ဒါပဲ ....။

“လိုက်မှတ် ... ပြောမယ် ... ဒီလိုရှိတယ်ဗျ။ ကျနော်လည်း သေချာတော့ မမှတ်မိဘူး။ စာရေးဆရာတွေ ထိုင် ထိုင်လေကန်တဲ့ ဒီနေရာကို လေထန်ကုန်းလို့ ဘယ်ကဘယ်လို ခေါ်ဖြစ်သွားတယ်ဆိုတာ ကျနော် မသိတာအမှန်ပဲ။ ဒါပေမယ့် ဒီဆိုင်ကို လေထန်ကုန်းလို့ ခေါ်ကြမယ်ဟေ့လို့ ပြောမိချင်လည်း ပြောမိ သွားလိမ့်မယ်ဗျ။ တခါက ဆရာမစန်းစန်းနွဲ့ကထင်တယ် အမှတ်တမဲ့နဲ့ ဒီလို ပေါက်ပေါက်ရှာရှာ နာမည်မျိုး မင်းလူ ပေးတာ နေမှာပဲလို့ ဒီဆိုင်မှာထိုင်ရင်း ပြောလိုက်တော့ ဒီနာမည်ကို မင်းလူ ပေးတာ ဆိုပြီးဖြစ်ကုန်တာဖြစ်မယ်။ အဖြစ်မှန်ကတော့ ကျနော်ပေးမိတယ် ဆိုရင်တောင် မမှတ်မိပါဘူး။ ဒါပဲ သွားရေးတော့။ ရေးပြီးရင် ကျနော့်ကိုလာပြဦး”

ကျမမှာ ကက်ဆက်လည်းမပါ။ လက်နဲ့တောင်ခြစ်မြောက်ခြစ် ခြစ် ... စိတ်ထဲကမှတ်ပြီး ဆရာမင်းလူနဲ့ အင်တာဗျူးကို အောင်မြင်စွာ အကောင်အထည်ဖော်နိုင်ခဲ့တယ် ဆိုပါတော့။ ဆရာကတော့ ကျမ ပြန်ရေး ထားတာကို သေချာဖတ်ပြီး တလုံးမှမပြင်ဘဲ ပြန်ပေးပါတယ်။ ပြီးတော့ “အေးဗျာ ... ခင်ဗျားက ဓားစာခံပါ။ ဟိုလူတွေလုပ်ပုံ မဟုတ်ဘူး” လို့ မကြေမချမ်းပြောရှာပါတယ်။ ကျမ အလုပ်မရမှာ စိုးလို့သာ ဒီအင်တာဗျူးကို သူပေးခဲ့တာပါ။ ကျမရုပ်ကလည်း ဒီအလုပ်ကိုမှမရရင် သေရပါတော့မယ် ဆိုတဲ့ပုံ ပေါက်နေတယ် ထင်ပါရဲ့။ ဘာပဲဖြစ်ဖြစ် ကျမကို စာပေလောကထဲ ရောက်အောင် ပံ့ပိုးပေးတဲ့ ဆရာ့ကို ဒီနေ့ထိ ကျေးဇူးတင်နေဆဲပါ။

ဆရာ့ဆီကနေ အင်တာဗျူးလေး အချောသတ်ပြီး ပြန်တဲ့အချိန်က ညနေ ၄ နာရီကျော်ပြီ။ အသင်းတိုက် ကနေ ရေတာရှည် လမ်းသစ်ရောက်တော့ ၅ နာရီထိုးတော့မယ်။ အင်တာဗျူးရေးထားတဲ့ စာရွက်ကို မဟာဆွေစတိုင် ထိုင်နေတဲ့ ကိုဟန်ထက်မောင်လက်ထဲ ထိုးထည့်လိုက်တာနဲ့ သူက ဖတ်ကြည့်ပြီး (ဖိုးပါကြီးလို)းပြုံးပါတယ်။ ပြီးတော့ ကျမရေးထားတာကို နည်းနည်း ဖြုတ်ပြင် ဘာညာလုပ်ပြီး စာစီ သမား ဆီ တန်းပို့လိုက်ပါတော့တယ်။ “ကဲ ... နက်ဖြန်ကစပြီး အလုပ်ဆင်းတော့။ အင်တာဗျူး ဂျာနယ်ရဲ့ အယ်ဒီတာ စာရင်းမှာ ညည်းနာမည် ထည့်လိုက်တော့မယ်” လို့ ပြောပါတယ်။ အဲဒီအချိန်မှာ ကျမအူမြူးလိုက်ပုံက ဘာနဲ့မှ မနှိုင်း ယှဉ် နိုင်လောက်အောင်ပါ။

ကျမရဲ့ အယ်ဒီတာသက်တမ်း တပတ်မပြည့်ခင်မှာ ထွက်လာတဲ့ အင်တာဗျူး အစ်ရှူး ၂ မှာ ကျမရဲ့ ဆရာမင်းလူနဲ့ အင်တာဗျူုးပါလာပါတယ်။ ဒီတိုင်းပါလာတာ မဟုတ်ပါဘူး။ ဝင်းဝင်း ဆိုတဲ့သူက ဆရာလင်းဝေမြိုင် (ကွယ်လွန်) ကို တပုံစံထဲ ဗျူးထားတာနဲ့ ယှဉ်လျက်သား။ အဲဒီတော့မှ သြော် လတ်စသတ် တော့ ပွဲဆူအောင်လုပ်တာကိုး လို့ ငတုံးကျမ သဘောပေါက်ရပါတော့တယ်။

ဂျာနယ်လေးကို ဆရာမင်းလူကို သွားပေးတဲ့အခါမှာ ဆရာက ကြည့်ပြီး “ထင်တော့ ထင်သားဗျ။ ဒီလူတွေ တခုခုတော့ လုပ်တော့မယ်ဆိုတာ။ ခုကြည့် ကျနော်နဲ့ ဆရာလင်းကို ရန်တိုက်ပေးတာ။ တော်သေးတာပေါ့ ကျနော်က အဖြေတတ်လို့။ ခင်ဗျားက ဓားစာခံပဲ” လို့ ဒေါသတကြီးပြောတယ်။

ဆရာလင်းက ဒီလေထန်ကုန်းဆိုတဲ့ နာမည်ကို သူပေးတာလို့ ဖြေထားတာလေ။ သူက ၁၀ တန်း အင်္ဂလိပ်စာသင်တော့ အဲဒီတုန်းကသင်ရိုးမှာပါတဲ့ စာရေးဆရာမ အမ်မလီဘရွန်တီရဲ့ ဝုသရင်းဟိုက် ကို လေထန်ကုန်းလို့ ဘာသာပြန်ခဲ့တာ။ ဒါနဲ့ ၃၃ လမ်းက စာရေးဆရာတွေ လေထိုင်ကန်တဲ့ လက်ဘက်ရည်ဆိုင်ကို ဒီနာမည်ပေးဖို့ စိတ်ကူးမိတယ် ဆိုတဲ့အကြောင်း အင်တာဗျုးမှာ ရေးထား လေရဲ့။ တော်သေးတာပေါ့ ဆရာမင်းလူက သူမမှတ်မိတော့ပါဘူးပြောလို့။ တကယ်လို့ ဒီနာမည်ကို သူပေးတာပါ ပြောလိုက်ရင် ပွဲဆူပြီး သက်သက်မယ့် ဆရာ ၂ ယောက် ဒုက္ခရောက်ရမယ့်အပေါက်။

အဲဒီမှာ ကျမလည်း စာနယ်ဇင်းပါးမဝသေးခင်မှာတင် စာနယ်ဇင်းအတတ်ပညာတခုကို ရလိုက်တယ် ဆိုပါတော့။ သြော် ... လတ်စသတ်တော့ မရှိရှိတာ ရှာကြံဖွပြီး ဂျာနယ် နာမည်ကြီးအောင် လုပ်တာပါလား လို့လေ။ အဲဒီထဲမှာ ကျမ၊ ဆရာမင်းလူနဲ့ ဆရာလင်းတို့က ဓားစာခံတွေ ပေါ့ (ဝင်းဝင်း ဆိုတဲ့ပုဂ္ဂိုလ်က ဓားစာခံမဟုတ်ဘူးနော်။ သူလည်း ဖွတဲ့ထဲပါတယ်)။ တကယ်က လေထန်ကုန်းကိစ္စ ဘာအရေးကြီးလဲ။ ဒီနာမည် ဘယ်သူပေးပေး ဘာဖြစ်လဲ။ ဘာမှမဖြစ်ပါဘူး။ အဲဒါကိုပဲ ကြံဖန် သတင်းလုပ်ရေးရင်း အင်တာဗျူးဂျာနယ်ဆိုတာ တခေတ်ဆန်းခဲ့လေရဲ့ (ယုံချင်ယုံ မယုံချင်နေ)။

ကျမလည်း စာနယ်ဇင်းသမားဘဝကို အူလည်လည်နဲ့ ရောက်ခဲ့တယ် ဆိုပါတော့။ သတင်းဂျာနယ်တွေ မပေါ်သေးတဲ့၊ ပေါ့ပ် ဂျာနယ်တွေ ခေတ်ထနေတဲ့ အချိန်မှာ အင်တာဗျူးဂျာနယ်က သတင်းဂျာနယ် ပုံစံလေး နည်းနည်းစပြီး မြေစမ်းခရမ်းပျိုးတယ် ဆိုရမယ်။ အဲဒီအချိန်က ၁၉၉၉ ခုနှစ်နှောင်းပိုင်း၊ ထောက်လှမ်းရေး ခေတ်ကောင်းချိန်ပေါ့။ အဲဒီတုန်းက စာပေကင်ပေတိုင်မှူးကြီးကတော့ ဗိုလ်မှူး အေးထွန်းပါ။ (ကဲ ၄ ကတော့ အေးဆေးပေါ့နော်။ ဒါပေမယ့် ကြော်ငြာလေးတော့ဝင်ခဲ့ဦးမယ် ... အင်တာဗျူးဂျာနယ်ရဲ့ ထောက်လှမ်းရေးက ရတဲ့ အတွင်းသတင်းတွေအကြောင်း ရေးမှာ ငှဲငှဲ။ တူးတူးသာတို့ အမှတ်မရှိပုံများနော် :P)







5 comments:

tg.nwai said...

နောက်နေ.မှ တင်မယ် ထင်နေတာ..တော်သေးတာပေါ့...:)..စိတ်ဝင်စားနေတာလေးတွေ သိရလို. ကျေးဇူးပဲနော်.. ဆရာမင်းလူကို အဲဒီလောက်တောင်ကြောက်ကြတယ်လား.. :( ကျမက ဆရာ့ပရိသတ်..

Moe Cho Thinn said...

အကို ဒီလောက် ဒေါသကြီးတာ မသိဘူး။ တွေ့ဖူး ခင်ဖူးတာတော့ ခပ်ပြုံးပြုံး နဲ့ အေးအေးပဲ။
အေးလေ..အကိုလဲ ဒီလိုမျိုးတွေ ဘယ်လောက် ခံထားရမှန်းမှ မသိဘဲ။
ကဲ ၄ ကိုတော့ ခပ်အေးအေးပဲ မျှော်ပါမယ် သနားလို့။

အောင်သာငယ် said...

အင်း သတင်းစာဆရာတွေ ခေတ်တုန်းက မီးခွက်မှုတ်တဲ့ သတင်းနဲ့ သတင်းစာ စောင်ရေတက်အောင် လုပ်သလိုမျိုး ဖြစ်နေပြီ ထင်ပါ့

ဆက်ရေးပါဦးဗျာ

JulyDream said...

ပဲကြီးလှော်ကြား ဆားညှပ်တော့မလို့ပေါ့နော်။

Andy said...

ကံကောင်းလို့ ကံကောင်းလို့

ကျုပ်တို့လဲ ဘာဖွရင် ကောင်းမလဲ..ဟဲဟဲ