ဝတ္ထုတို ၁၄

တကယ့်အဖြစ်အပျက်တခုကို စိတ်ကူးနဲ့ ရောမွှေထားတဲ့ ဇာတ်လမ်းတပုဒ်ပါ။ ဒီဇာတ်လမ်းကို ချရေးဖို့ ကျမကို မြှောက်ပေးတဲ့သူက ရှိနေတော့ နဂိုကတည်းက ရေးချင်ချင်ကျမအတွက် အဆင်ပြေသွား တာပေါ့လေ။ တခုဝန်ခံစရာရှိတာက ဒီဇာတ်လမ်းကျောရိုးရယ်၊ နေရာရယ် ကလွဲရင် နာမည်တွေနဲ့ ဖြစ်ပျက်ပုံ အသေးစိတ်က ကျမရဲ့ စိတ်ကူးသက်သက်သာ ဖြစ်ပါတယ်။ တူးတူးသာတယောက် ရူးပြီး လျှို့ဝှက်သည်းဖိုလိုလို၊ ဂမ္ဘီရလိုလို လုပ်လာပါလားလို့ ထင်ရင်လည်း ထင်နိုင်ပါတယ် :P ကဲ ... ငါ့တူကြီးရေ ရေးပြီဟေ့။ ပြောခဲ့သလို ကြိုက်တယ်ဆိုရင်တော့ ကြော်ငြာပေးပေါ့ကွာ .. ဟုတ်လား။

ဝါးရင်းတုတ် ပုံပြင်

တကယ့်ကို ထိတ်လန့် အံ့သြစရာ အဖြစ်အပျက်တခု ကျမတို့ သန်လျင်မြို့ကလေးမှာ ဖြစ်ခဲ့တာပါ။ အဲဒီတုန်းက ကျမရဲ့အသက်က လွန်ရောကကျွံရော ၁၁ နှစ် ၁၂ နှစ်လောက်ပေါ့။ ကျမရဲ့ အသက်ကို အတိအကျ မမှတ်မိပေမယ့် အဲဒီတုန်းက သန်လျင်တမြို့လုံး ဟိုးလေးတကျော်ကျော်နဲ့ ဖြစ်ခဲ့တဲ့ အဲဒီအဖြစ် အပျက်ကိုတော့ ကျမ မမေ့နိုင်ဘူး။

ကျမမေမေရဲ့ အခင်ဆုံးသူငယ်ချင်း အန်တီတိုးမှာ သိပ်ချောသိပ်လှတဲ့ တူမ ၂ ယောက် ရှိတယ်။ အကြီးက ဝါဝါ၊ အငယ်က နီနီ တဲ့။ သူတို့ အမေက အင်္ဂလို မြန်မာစပ်ဆိုတော့ သူတို့မျက်နှာ လေးတွေက နုဖပ်ပြီး သိပ်ချစ်စရာကောင်းတယ်။ အသားလေးတွေကလည်း ဖြူဖွေးလို့။ သူတို့က အဒေါ်အပျိုကြီး အန်တီတိုးနဲ့ နေတာများတယ်။ မေမေက အန်တီတိုးဆီသွားလည်ရင် ကျမပါ လိုက်လိုက်သွားလေ့ရှိတယ်။ အဲဒီတုန်းက အဲဒီမမတွေက ၁၀ တန်းတဲ့။ မမဝါက ၁၀ တန်း ၁ နှစ်ကျ ထားတာ။ မမနီကတော့ အဲဒီနှစ်ကမှ ၁၀ တန်းပေါ့။

အဲဒီအချိန်က ခေတ်စားတဲ့ ဖြောင့်စင်းနက်မှောင်တဲ့ ဆံပင်တွေကို အလယ်ခွဲ ခွဲထားတဲ့ ဂျူးလိယက် ပုံစံ ဆံပင်လေးတွေ ဆင်တူ၊ အင်္ကျီဆင်တူ ထဘီဆင်တူနဲ့ အဲဒီ မမနှစ်ယောက်ကို ကျမ အမြဲ ငေး ငေး ကြည့်မိတယ်။ အသက်က မတိမ်းမယိမ်းဆိုတော့ အမွှာညီအစ်မလို့တောင် တချို့ကထင်ကြတယ်။ သူတို့ ၂ ယောက်က ခုလို တံတားကြီး မထိုးရသေးတဲ့ အချိန်၊ သန်လျင်လို တောကျကျ မြို့ကလေးမှာ တကယ့် စတားတွေပေါ့။

ကိုကို ကာလသားတွေရဲ့ ပါးစပ်ဖျားမှာ ဝါဝါနဲ့ နီနီ ဆိုတာ မပြောဖြစ်တဲ့နေ့ ရှိမယ်မထင်ဘူး။ သူတို့ ၂ ယောက်က လှသလောက် မာနကြီးတယ်၊ ဘယ်သူ့ကိုမှ စိတ်မဝင်စားဘူး ဆိုတာကလည်း အဲဒီတုန်းက ကောင်လေးတွေရဲ့ စိတ်ထဲ ကျလိကျလိနဲ့ အသည်းယားစရာ။ တချို့ကျတော့ မရတဲ့ အမဲ သည်းနဲ့ ပက် ဆိုတာလို အဲဒီညီအစ်မကို ကွယ်ရာမှာ မလိုတမာ စကားတင်းပြောကြတယ်။

မေမေကတော့ “မာနကြီးမယ်ဆိုလည်း ကြီးလောက်တယ်လေ၊ သူတို့က သန်လျင်မှာ အချမ်းသာဆုံး ဆိုတဲ့ စာရင်းထဲ ပါတာကိုး” လို့ ပြောလေ့ရှိတယ်။ ဘယ်လိုပဲဖြစ်ဖြစ် သူတို့ ၂ ယောက် လှတာကတော့ ဘယ်သူမှ မငြင်းနိုင်ဘူး။

ချမ်းသာတယ်ဆိုလို့ ဟုတ်တော့ ဟုတ်သား။ အဲဒီတုန်းက ကျမတို့ မြို့ကလေးမှာ ကိုယ်ပိုင်ကား စီးနိုင်တဲ့သူ အရေအတွက် လက် ၅ ချောင်း မပြည့်သေးတဲ့ အချိန် မမတို့ ဖေဖေက အနက်ရောင် မာဆီဒီး ကားကြီး စီးနိုင်တယ်လေ။ သူတို့အိမ်ကြီးကလည်း ကျမတို့ မြို့ကလေးရဲ့ အကောင်းဆုံး နဲ့ အကြီးဆုံး ဆိုတဲ့ထဲမှာ ပါပါတယ်။

မာနကြီးတဲ့ သူတို့ ညီအစ်မ ၂ ယောက်နောက်ကို လိုက်တဲ့ ဘယ်ယောက်ျားသားမဆို တပ်ခေါက်ပြီး ပြန်ရတာ ချည်းပဲ။ သူတို့ ညီအစ်မက ဟားတိုက်လှောင်ပြောင်လွှတ်လိုက် တာချည်းပဲလို့ ကြားဖူးတယ်။ သူတို့ကြောင့် ရူးကြောင်ကြောင် ဖြစ်ကုန်တာ၊ သူတို့ကြောင့် အရက်အိုးထဲ ခေါင်းနစ်ကုန်တာ၊ သူတို့ကြောင့် စစ်ထဲ ဝင်သွားတာ .... သူတို့ကြောင့် ... သူတို့ကြောင့် ဆိုတာတွေက တခါနဲ့ တခါ မထပ်စေရဘူး။ ပိုတယ် မထင်ပါနဲ့ ... ကျမတို့ မြို့ကလေး အနေအထားနဲ့ အဲလိုကို ဖြစ်ခဲ့တာပါ။

တခုသော ဒီဇင်ဘာ မနက် ဝေလီဝေလင်း အချိန်မှာတော့ ကျမတို့ မြို့ကလေး တမြို့လုံး အထိတ်တလန့်နဲ့ လှုပ်လှုပ်ရှားရှား ဖြစ်ခဲ့တဲ့ ဖြစ်ရပ်တခုက စိတ်ကူးယဉ်ဇာတ်လမ်း တပုဒ်လိုမျိုး ဖြစ်ခဲ့ပါတော့တယ်။ အဲဒီနေ့က သန်လျင်မှာ နှင်းတွေ ဝေနေလေရဲ့ ....။

* * * *

နှင်းမှုန်ကလေးတွေ ကျနေတဲ့အသံက ဖြိုးဖြိုးဖျောက်ဖျောက်နဲ့။ နှင်းတောထဲ လမ်းလျှောက်ရတာ နီနီ အရမ်းသဘောကျတယ်။ ဒါကြောင့်လည်း ကျူရှင်ချိန်ကို မနက်ပိုင်း ရွေးတာပေါ့။ မမက နီနီ့လိုမဟုတ် ဘူး။ မနက်အစောကြီးထရမှာ ပျင်းတယ်တဲ့။ စာကိုညဥ့်နက်ထိ ကြည့်ပြီး မနက်ကို စောစော မထဘူး။ သူကတော့ဟုတ်တာပေါ့ တနှစ်ကျပြီးသားဆိုတော့ ကျောင်းလည်း ပြန်မှ မတက်တော့တာ။

နီနီကတော့ မနက်အစောကြီးထ၊ ချမ်းလို့ ရေမချိုးနိုင်ပေမယ့် မျက်နှာသစ်ပြီး သနပ်ခါးကို ရေကြဲလေး လိမ်း၊ ဒက်ဒီနိုင်ငံခြားက ဝယ်လာတဲ့ ယုန်မွှေးဆွယ်တာ အညိုလေးနဲ့ ကျူရှင်ကို လမ်းလျှောက်သွား ရတာ သိပ်ပျော်ပေါ့။ ကျောင်းက နေ့လည်မှ တတ်ရတာဆိုတော့ ကျောင်းဝတ်စုံဝတ်စရာ မလိုသေးဘူး လေ။ ဆွယ်တာလေးနဲ့လိုက်တဲ့ ထဘီကို နီက ချပ်ချပ်ရပ်ရပ် ဝတ်တတ်တယ်။ သြော် ကျန်သေးတယ်။ နီ့ခေါင်းမှာ ခြံထဲက စပယ်ရုံမှာပွင့်နေတဲ့ စံပယ်ပန်းတခက်ချိုးပန်ခဲ့တယ်။ ပန်းလေးက သိပ်လတ်ဆတ် တာပဲ။ နှင်းမှုံလေးတွေတင်နေတဲ့ စံပယ်ပန်းကို နီ သိပ်ချစ်တာလေ။ အိပ်ပုပ်ကြီးတဲ့ မမကတော့ အဲလို အခွင့်အရေးတွေ မရတော့ဘူးပေါ့။ ဖေဖေ ဆင်တူဝယ်ပေးတဲ့ ဆွယ်တာလေးတောင် မမ ထုတ်မဝတ်ရ သေးဘူး။

သန်လျင်မြို့ကြီးက အိပ်မောကျနေတာ မဟုတ်ပေမယ့် အိပ်မှုန်စုံမွှား အခြေအနေလို့ ပြောရမယ် ထင်ပါရဲ့။ နီတက်ရမယ့် ကျူရှင်ဘက်မှာဆို အိမ်တွေ တံခါးတောင် မဖွင့်သေးဘူး။ ဒီနေ့ထူးဆန်းတယ်။ ခါတိုင်းဆို နီ သာဓုလမ်းထဲ ချိုးဝင်လိုက်တာနဲ့ သိန်းတန်ကို တွေ့ရပြီ။ နီ့နောက်က တကောက်ကောက် လိုက်၊ ပြီးရင် နီ့ကိုသူ ဘယ်လောက်ချစ်တယ် ဆိုတာပြော၊ သူ့ကို ပြန်ချစ်ဖို့ တောင်းဆိုနဲ့။ ရီရတယ်။ နီက သူ့ကိုပြန်ချစ်ရမတဲ့။

သူ့ရုပ်ကတော့ သိပ်မဆိုးလှပါဘူး။ အသားလတ်လတ်၊ နှာတံပေါ်ပေါ်နဲ့ အရပ်က ခပ်မြင့်မြင့်။ မျက်နှာ ကတော့ ဂျစ်တစ်တစ်။ မနေ့ကတော့ နီ့လက်ကိုသူက လှမ်းကိုင်ဖို့လုပ်တာနဲ့ တော်တော့ကို ပြောပစ် လိုက်တယ်။ နီက ဒါတွေ မစဉ်းစားသေးဘူးလေ။ စဉ်းစားရင်လား သူလိုကောင်ဝေးလို့ သန်လျင်မြို့က အချမ်းသာဆုံးဆိုတဲ့သူတွေရဲ့ သားတွေကိုတောင် မစဉ်းစားဘူး။ သိန်းတန်အမေက မကောင်းတဲ့ မိန်းမကြီးတဲ့၊ ဒီကောင်က ဆယ်တန်းကို ၁ ခါကျထားတာ၊ ပြီးတော့ ဆိုးတဲ့ တေတဲ့ နေရာမှာ နာမည်ကြီးပဲ။ ဘာတခုမှ ကောင်းတာမရှိ။

တော်တော်တော့ ဇွဲကောင်းတဲ့သူ။ နီ့နောက်ကို လိုက်နေတာ တော်တော်ကြာပြီ။ တခြားသူတွေဆို တပ်ခေါက်ပြန်ရောပေါ့။ သူကတော့ လုံးဝတပ်မခေါက်ဘူး။ ဒါပေမယ့် ဒီနေ့ထူးဆန်းတယ်။ ခုထိကို မတွေ့ရသေးဘူး။ သတိရတယ်တော့ မဟုတ်ပါဘူး။ မြင်နေကျမမြင်တော့ တမျိုးဖြစ်တာပါ။ တခုတော့ ရှိတယ်။ မနေ့က နီပြောလိုက်တဲ့ စကားကြောင့် တပ်ခေါက်သွားတာများလားမသိ။ အဲလိုဆိုလည်း ခပ် ကောင်းကောင်းပဲ။

“နင်လို မကောင်းတဲ့ မိန်းမက မွေးတဲ့ သားမပြောနဲ့ ဒီတမြို့လုံးက အချမ်းသာဆုံးဆိုတဲ့ဟာတွေတောင် ငါစိတ်မဝင်စားဘူး။ နောက် နင်ငါ့နောက်လိုက်ဖို့ မကြိုးစားနဲ့။ ကြားလား”

အဲလိုပြောလိုက်တဲ့ အချိန်မှာ သိန်းတန် ငြိမ်သွားပြီး နီ့ကို စူးစူးရဲရဲ စိုက်ကြည့်နေတယ်။ သူကြည့်တာ တကယ့်ကို ကြောက်စရာကြီးပဲ။ ဒါပေမယ့် နီလား ... မကြောက်ပါဘူး။ အဲလိုပြောလိုက်တော့ တတော ရှင်းတာပေါ့။ ခုဆို နှင်းမှုံကလေးတွေရယ် နီရယ်ပဲ ရှိတယ်။ ဟင် .... နှင်းတွေက ပိုတောင်ကျလာ သေးတယ်။ ရှေ့ကိုတောင် သိပ်မမြင်ရချင်ဘူး။ ဒါပေမယ့် ရှေ့မှာ .. ရှေ့မှာ ...။ လူတယောက် ထင်တယ်။ နီ့ ရှေ့က ပိတ်ရပ်နေတာ။

“နီ့ရဲ့ လည်တိုင်လေးက သိပ်လှ၊ သိပ်ကျော့ရှင်းတာပဲ။ ဘာမှမဝတ်ဘဲကို ကြည့်ကောင်းတာ။ ကြည့်စမ်း မာမီ့ ပတ္တမြား ဘယက်ကလေးနဲ့ ဘယ်လောက်လိုက်လဲ။ ပွဲလမ်းရှိရင် ဝတ်သွားနော်” လို့ မာမီက အမြဲပြောလေ့ ရှိတယ်။ ဖော့ဖရောင်းလေးလို၊ လက်နဲ့ ထိလိုက်ရင်တောင် ပဲ့ကြွေသွားမတတ် ဖြူစင် ဝင်းပ နေတဲ့ နီ့လည်တိုင်လေးပေါ်ကို ဝါးရင်းတုတ်ကြီးတချောင်း အရှိန်နဲ့ ကျမလာခင်ထိ အဲဒီနေရာလေးက သာယာနေခဲ့တာပါ။

* * *
အံ့အားသင့်နေတဲ့ ပဲပြုတ်သည်ကြီးရယ် .... ခွေခွေလေးလဲကျနေတဲ့ ကောင်မလေးတယောက်ရယ်။ အံကြိတ်ပြီး “ငါက အချစ်ကြီးတယ် မိနီ သိလား။ ဒါပေမယ့် အမေ့ကိုထိရင် လုံးဝမခံဘူး။ အဲဒါကို နင် တမလွန်ထိ မှတ်သွားလိုက်” လို့ပြောရင်း နေရာက ချာကနည်းလှည့်ထွက်သွားတဲ့ ကောင်လေးတ ယောက်ရယ် ...။ ကျန် သေးတယ် အနီဘက်ကို ကူးပြောင်းသွားတဲ့ စပယ်ပန်းခက်ကလေးရယ်ပေါ့။

နှင်းတွေက သည်းသည်းထန်ထန်ကျဆဲပဲ။ လမ်းကလေးက ခဏတော့ တိတ်ဆိတ်သွားခဲ့တယ်။ ပဲပြုတ်သည်ကြီး သတိမဝင်ခင်ထိပေါ့။ နှင်းတွေဝေလွန်းလို့ ကောင်လေးမျက်ဝန်းက မျက်ရည်စတွေကို တဦးတည်းသော သက်သေ ပဲပြုတ်သည်ကြီး မမြင်လိုက်ရဘူး။

* * *
အဲဒါပါပဲ .... ကျမတို့ မြို့ကလေးမှာ အဲဒီအချိန်ကစလို့ ဝါးရင်းတုတ်ဆိုတဲ့ ဝေါဟာရ တခုကို တွင်တွင် သုံးလာ ကြတာ ...။ မိန်းကလေးတယောက်လုံးကို ရက်ရက်စက်စက် သတ်လိုက်တယ်ဆိုတဲ့ သိန်းတန်က အဲဒီနေ့မှာပဲ ဝါးရင်းတုတ်နဲ့အတူ သန်လျင်ရဲစခန်းမှာ သွားအဖမ်းခံတယ်တဲ့။
ကျမ အစ်မ အပျိုတွေကို လူကြီးတွေ ဆုံးမတဲ့အခါတိုင်း ဝါးရင်းတုတ်က မပါမပြီးဘဲ။

“နင်တို့နော် ... အပြောအဆို မတတ်ရင် ဝါးရင်းတုတ်စာ မိသွားမယ်။ ဘာမှတ်လဲ။ ဟင်းဟင်း” အဲလိုမျိုး ဆုံးမတာ မခံရဘူးတဲ့ အဲဒီခေတ်က မိန်းကလေးဆိုလို့ သန်လျင်မှာ တယောက်မှ ရှိမယ် မထင်ဘူး။ ကျမတောင် အပျိုမဟုတ်သေးဘဲ ရောကောသောကော ဆုံးမခံလိုက်ရသေး ...။

ကျမတို့ မိန်းကလေးငယ်တွေအတွက်ကတော့ ဒီကိစ္စဟာ ကျောင်းမှာ သိပ်ကို ပြောလို့ကောင်းတဲ့ ကိစ္စပေါ့။ အဲဒီမှာ ကျမမေမေက အန်တီတိုးနဲ့ သိတဲ့သူ၊ ကျမကိုယ်တိုင် အဲဒီမမတွေအကြောင်းသိတဲ့ သူဆိုတော့ (စာရေးဆရာဖြစ်မယ့် ဇာတာကလည်း ပါလာထင်ပါရဲ့) ဇာတ်လမ်းတပုဒ်လို တဖွဲ့တနွဲ့ ပြောပြတော့တာပါပဲ။

သူငယ်ချင်းမိန်းကလေးတွေဆိုတာ ဒီဇာတ်လမ်းပြောနေတဲ့အချိန် တယောက်ကို တယောက် ပူးကပ် ထိုင်ကြတာ၊ ခဏနေပဲ ကိုသိန်းတန်တယောက် ဘွားကနဲ ဝါးရင်းတုတ်ကြီးနဲ့ ရောက်လာတော့မှာ လိုလို .... ။

* * *

အဲဒီတုန်းက ဟိုးလေး တကြော်ကြော်ဖြစ်ခဲ့တဲ့ ဇာတ်လမ်းနဲ့အတူ ရက်မလည်ခင်မှာ ဂမ္ဘီရဆန်ဆန် ဖြစ်ရပ်တခုလည်း ဖြစ်ခဲ့သေး တယ်။

ရက်မလည်ခင် တည မမနီတို့အိမ်ကို အန်တီတိုးရဲ့ မိတ်ဆွေတယောက် ရောက်လာတယ်။ သူက ရပ်ဝေးမှာနေတာ။ အသုဘအိမ်ကိုတွေ့တာနဲ့ အဲဒီလူကြီးက အန်တီတိုးကို “ဟဲ့တိုးတိုး ... နင့်တူမ အငယ်လေး ဆုံးသွားတာ မဟုတ်လား” လို့ မေးတယ်တဲ့။ ဒီအထိက မထူးဆန်းပါဘူး။ သတင်းစာမှာ ပါပြီးသားပဲဟာ။

ထူးဆန်းတာက အဲဒီလူကြီး အာပေါင်အာရင်းသန်သန်နဲ့ ဆက်ပြောတဲ့ စကားတွေပါပဲ။ ကျမမေမေ ကြားခဲ့ရလို့ ကျမကိုပြန်ပြောပြတာပါ။ အဲဒီလူကြီးက သန်လျင်ကိုမလာခင် အကြီးအကျယ် ငှက်ဖျား ဖြစ်ပြီး သတိလစ်သွားတာတဲ့။ သတိလစ်တဲ့အချိန် (မျောနေချိန်) သူ တနေရာကိုရောက်သွားတော့ အဲဒီမှာ သေပြီးသား သူတွေနဲ့အတူ မမနီကိုတွေ့တယ်တဲ့။

“ဟဲ့ နင် တိုးတိုးတူမလေး နီနီ မဟုတ်လား။ ဒီမှာ ဘာလုပ်နေတာလဲ”
“ဟုတ်ကဲ့ဦး။ သမီးဒီမှာ အပြီးနေမှာ။ ဦးကပြန်မှာ မဟုတ်လား။ ဦးပြန်မယ်ဆိုရင် သမီးတခုလောက် မှာလိုက်ပါရစေ။ မမဝါကိုပြောပေးပါဦးရယ်။ သမီးရဲ့ ကွန်ပါဘူးထဲက ဖောင်တိန်အနီလေးက သမီး သူငယ်ချင်း ယဉ်ယဥ့်ဥစ္စာ။ ပြန်ပေးပေးပါလို့ .. နော်”
“အေးအေး ဦးပြန်ရောက်တာနဲ့ သွားပြောပေးမယ်”

သူတို့ ၂ ယောက် အပြန်အလှန် အဲလိုတွေပြောပြီးနောက်မှာ အဲဒီလူကြီးက သတိပြန်လည်လာပြီး။ နေပြန်ကောင်းတာနဲ့ ချက်ချင်းပဲ သန်လျင်က အန်တီတိုးဆီ အပြေးထွက်လာတာ ဆိုပဲ။

သူ့စကားဆုံးတာနဲ့ မမဝါက တိုင်မှာချိတ်ထားတဲ့ မမနီရဲ့ ကချင်လွယ်အိတ်ကလေးထဲက ကွန်ပါဘူး လေးကို ထုတ်ကြည့်လိုက်တဲ့ အချိန်မှာ တကယ်ပဲ မယဉ်ယဉ်ရဲ့ ဖောင်တိန် အနီရောင်လေးကို တွေ့တယ်လို့ မေမေက အံ့သြတကြီးပြောပြတယ်။

အဲဒီအကြောင်းတွေကို ကျမက သူငယ်ချင်းတွေကို ပုံပြင်တပုဒ်လို ပြန်ပြန်ပြောပြတာ။ ကျမတို့ အ ထ က ၃ ကျောင်းတော်ကြီးမှာ အဲဒီရက်တွေက ဝါးရင်းတုတ်ဆိုတာ ဇာတ်လိုက်ကျော်ကြီးပါပဲ။ လူတိုင်းရဲ့ ပါးစပ်ဖျားမှာ ရေပန်းစားနေတဲ့ ဝါးရင်းတုတ်ဆိုတာကို တွင်တွင်ပြောနေပေမယ့် ကျမ ဝါးရင်းတုတ်ကို မြင်တောင် မမြင်ဖူးပါဘူး။ ဝါးပင်နဲ့ ဝါးလုံးကိုသိပေမယ့် ဝါးရင်းတုတ်ဆိုတာ ဘယ်လိုဟာလဲ ကျမ မသိတာ အမှန်ပါ။ နောက်မှ ဝါးပိတ်ဝါးရဲ့ အရင်းဘက်ကိုခေါ်တယ်ဆိုတာ သိတော့တာ။

ကာလ အတန်ကြာတဲ့ အထိ ဝါးရင်းတုတ်၊ နီနီနဲ့ သိန်းတန်တို့ရဲ့ ဇာတ်လမ်းဟာ သန်လျင်မြို့မှာ မှေးမှိန် သွားခြင်းမရှိပါဘူး။ သန်လျင်မြို့က ကောင်မလေးတွေဟာ သူတို့ကိုစကားလိုက်ပြောတဲ့ ကောင်လေး တွေကို ပြန်မကြိုက်နိုင်သည့် တိုင်အောင် စကားမာမာ မပြောရဲကြဘူး (အဲဒီကာလတွေက ပြောပါ တယ်။ ခုတော့ မသိဘူးနော်)။ ကျမဆို ဝါးရင်းတုတ်ကိုစဉ်းစားမိတိုင်း လည်ပင်းက ယားယား လာတတ်တာ။

ကိုသိန်းတန်ကို သေဒဏ် အမိန့်ချလိုက်တယ်တဲ့။ သန်လျင်လူထုရဲ့ အမုန်းကတော့ ကိုသိန်းတန်ဆီမှာ ပုံကျနေလေရဲ့။ မျက်မြင်သက်သေကလည်း ပဲပြုတ်သည်ကြီး တယောက်လုံးရှိ၊ သူကိုယ်တိုင်လည်း ဝန်ခံဆိုတော့ အမှုက လုံးဝထင်ရှားနေတာ။ နောက်ပြီး သူက သေစေလိုလို့ တမင် ကြံစည်ပြီး သတ်တာဆိုတော့ အမှုက ပိုကြီးသွားတာပေါ့။

၈၈ အရေးတော်ပုံကြီး နောက်ပိုင်းမှာတော့ ဝါးရင်းတုတ်အကြောင်း သန်လျင်မြို့မှာ သိပ်မပြောကြ တော့ပါဘူး။ ဝါးရင်းတုတ်ထက် စ်ိတ်ဝင်စားစရာ ဇာတ်လမ်းတွေ ပေါ်လာခဲ့တာကိုး။ ကောင်မလေး တွေကိုလည်း လူကြီးတွေက “နင်တို့နော် ဝါးရင်းတုတ်စာတော့ မိတော့မှာပဲ” လို့ ဘယ်လူကြီးကမှ မဆုံးမကြတော့ဘူး။

မမနီရဲ့ အုတ်ဂူလေးက သူတို့ ခြံဝင်းကြီးထဲမှာ မနှစ်ကထိ ရှိနေပါသေးတယ်။ အဲဒီခြံကြီးထဲမှာ ဘယ်သူတွေ နေတယ်တော့ မသိဘူး။ မမဝါကတော့ အိမ်ထောင်ကျပြီး အမေရိကားကို အပြီး ထွက်သွားပြီလို့ ကြားတယ်။ ထူးခြားတာက သူ့ယောက်ျားက ကျမတို့ မြို့က ဝက်သားသည်ကြီးရဲ့ သားတဲ့။

မနှစ်က စက်တင်ဘာဆန္ဒပြပွဲ အပြီးလောက်မှာ ကိုသိန်းတန် ပြန်လွတ်လာတယ်လို့ ကျမ ကြားတော့ ဝါးရင်းတုတ်ကို သတိရလိုက်မိတယ်။ မမနီရဲ့ မျက်နှာနုနုလေးကိုလည်း မြင်ယောင်လာတယ်။ မြန်မာ ပြည်ရဲ့ တရားစီရေးတွေ၊ ဥပဒေ ရေးရာတွေ နားမလည်တဲ့အတွက် သေဒဏ်ကျခံပြီးတဲ့ သူတယောက် ဘာလို့ ပြန်လွတ်လာလဲဆိုတာ ကျမ နားမလည်ပါဘူး။

အဲဒီအချိန်မှာ သူဘယ်လိုနေမလဲ ဆိုတာတော့ ဝတ္ထုရေးဝါသနာပါသူပီပီ ကျမသိချင်မိတယ်။ ဟိုးတုန်းက ကျမရဲ့ ကလေးအတွေးမှာ လူကြမ်းကြီးကိုသိန်းတန်က စက်တိုင်ပေါ် ဖြည်းဖြည်းချင်း တက်သွား နောက်ဆုံးအနေနဲ့ အံတချက်ကြိတ်ပြီး “နီနီရေ .. မင်းနောက်ကို ငါလိုက်လာပြီဟေ့” လို့ ပြော။ ပြီးတဲ့အချိန်မှာ မျက်နှာကိုအဝတ်နက်ကြီးအုပ်၊ စက်ခလုပ်နှိပ် ....ဝုန်းကနဲ အဲလို စိတ်ကူးယဉ်ခဲ့ဘူးတယ်။

ဒါပေမယ့် စိတ်ကူးယဉ်တယ်ဆိုတာ တကယ့်လက်တွေ့မှ မဟုတ်တာပဲ။ ခုတော့ ကိုသိန်းတန်လည်း မိန်းမရနေပြီပြောတယ်။ သူ့အမေကြီးနဲ့အတူ သန်လျင်မှာ သူတို့လက်ငုတ် အရက်ပုန်းချက်တဲ့ အလုပ် လုပ်နေတယ်တဲ့။ နောက်တော့ သူက တခါတလေ စွမ်းအားရှင် လုပ်တယ်လို့လည်း လူတွေက ပြောကြတယ်။ သူ လွတ်လာတော့ မမနီရဲ့ အုတ်ဂူရှိရာကို သူသွားကြည့်ခဲ့လား၊ မကြည့်ခဲ့ဘူးလား မသိပါဘူး။

ခုတော့ ကျမမေမေကော အန်တီတိုးကော အသက်တွေ ကြီးပြီ ...။ တလောက ကျမမေမေ့ဆီ ဖုန်းဆက်ရင်း သတိရတာနဲ့ အဲဒီအကြောင်း မေးကြည့်တော့ မေမေက ပြောပြတယ်။ မမနီတို့ခြံကြီးက ခု တည်းခိုရိပ်သာ ဖြစ်နေပြီတဲ့။ သန်လျင်မှာ ပြည့်တံဆာ မိန်းကလေးတွေ အများဆုံးလို့ နာမည်ကြီးတဲ့ တည်းခိုရိပ်သာ တဲ့ ...။ မမနီရဲ့ အုတ်ဂူကော ဆိုတော့ နောက်ဝယ်တဲ့သူက ဖျက်လိုက်တယ်တဲ့။

အဲဒီဇာတ်လမ်းရဲ့ အဓိက ဇာတ်လိုက်ကြီးဖြစ်တဲ့ ဝါးရင်းတုတ်ကတော့ သန်လျင် ရဲစခန်းမှာ လဲလျောင်း ငြိမ်သက် နေပါလိမ့်မယ်။

နှင်းတွေဝေတဲ့ ဒီဇင်ဘာ နံနက်ခင်းတခုမှာ အဲဒီအဖြစ်အပျက်တွေ တကယ်ကို ဖြစ်ခဲ့တာပါ ...။ ။







8 comments:

Moe Cho Thinn said...

ညီမရေ
ဝတ္ထုဖတ်ရတာ လည်ပင်းယားလိုက်တာ။
တကယ့်အဖြစ်အပျက်လိုပဲ။ စိတ်ကူးနဲ့ ရောမွှေထားတာ ဆိုပေမဲ့လေ..။
ဘယ်သူ့ကိုမှ မှန်စေအုံးတော့ နစ်နာသွားအောင် မပြောသင့်ဘူးလို့ သေချာနားလည်သွားတယ်။ နှုတ်ကျွံရင် နှုတ်ရခက်တယ် မဟုတ်လား။ သတိထားသင့်တာပေါ့။ အကျိူးမရှိဘူးလေ။
ညီမရေ..
အခုလို စာပုဒ်လေးတွေ ခွဲရေးထားတော့ ဖတ်ရတာ သိပ်အဆင်ပြေတာပဲ။ ၀မ်းသာလိုက်တာ။

Andy said...

အမရဲ့ ဝတ္ထုတွေထဲမှာ ဒါလေးက အရသာတစ်မျိုးပဲနော်

နန်းညီ said...

ကြောက်စရာကြီးပါလား .. (အခုခေတ်မှာတော့ ၀ါရင်းတုတ်စာ မိမယ်နော်လို့ ဆုံးမရင် .... ...) အင်း... အဓိပ္ပါယ်က တစ်မျိုးဖြစ်နေမှာနော် အစ်မ

ကောင်းကင်ကို said...

သနားစရာကောင်းလိုက်တာဗျာ။း-(
သေအောင်တောင် ရိုက်ရတယ်လို့ ။

စိုးဇေယျထွန်း said...

မတူးက ၀ရင်းတုတ်စာ မိမှာစိုးလို့ ကိုဖိုးသိုက်ကို ယူခဲ့တာလား :P

puluque said...

ဇာတ်လမ်းလေးက ကောင်းလိုက်တာဗျာ။ လည်ပင်းပဲ ယားလာသလိုလို.. ကြက်သီးပဲထလာသလိုလိုပါပဲ။

JulyDream said...

ဦးအောင်ဇေယျ အမျိုးတွေပဲ... ၀ါးရင်းတုတ်ကိုင်တာ ကျွမ်းတာပေါ့။

mm thinker said...

အစ်မ
ကျနော် ဒါဖတ်ပြီး ပြေးသတိရတာရှိတယ်။
မရေးခင် ပြောချင်တာက ဝတ္ထု အပေါ်ပိုင်းဟာ တကယ် အဖြစ်ဆိုတာပဲ။

ကျနော်ဦးလေးရဲ့ ကုန်ကားနဲ့ လိုက်နေတုန်းက ဘယ်ကားသမားဆို ညဘက်မှာ မနားရဲ့တဲ့ နေရာ သန်လျင်ကုန်းတစ်ခုမှာ ရှိဖူးတယ်။

သူရဲမလေးဟာ အရမ်းချောက်တယ် ပြောတယ်။

ကျနော်ကိုယ်တိုင် အခါများစွာ အဲဒီနေရာနဲ့ အိမ်ကြီးကို ကားဆရာတွေ ပြလို့ မြင်ဖူးတယ်။

ဒီဇာတ်လမ်းရဲ့ နေရာလို့ ကျနော် ထင်တာပဲ။

ဇာတ်လမ်းလေးဖတ်ပြီး ကိုသိန်းတန်ကြီး အချစ်ကြီးချက်ကို အလန့်တကြားတွေ့ရတယ်ဗျ။

နောက်တစ်ခါ အစ်မနဲ့တွေ့ရင် ကျတော်လည်း ဇာတ်လမ်းလေး တချို့ ပြောပြဦးမယ်။

ကျနော်တော့ ဒီလို ဖတ်ကောင်းအောင် မရေးတတ်ဘူးရယ်။